ദോശ - Dosa

ചില സംഭവങ്ങൾ അങ്ങനെയാണ്. അങ്ങനെയങ്ങ് ഇരിക്കുമ്പോ പെട്ടെന്നങ്ങ് സംഭവിക്കും. പിന്നെ മനസ്സിൽ അതങ്ങനെ കിടക്കും.

അന്നൊരു  ഞായറാഴ്ച. അതിരാവിലെ എഴുന്നേറ്റ് അമ്പലത്തിൽ പോകണം.തൊഴാൻ മാത്രമല്ല . അവിടെ കീഴ്ശാന്തി ആയതുകൊണ്ടുതന്നെ ആദ്യം എത്തേണ്ട ഉത്തരവാദിത്തം, ഹോമത്തിനുള്ള കാര്യങ്ങൾ തയ്യാറാക്കൽ തുടങ്ങിയ ചുമതലകൾ തീർക്കാൻ ഉണ്ട്. ഞായറാഴ്ച ആയതുകൊണ്ട് തന്നെ ആ ദിവസം രാവിലെ അമ്പലത്തിലെ ജോലികൾക്ക് ശേഷം എനിക്ക് തൊടുപുഴ ജ്വല്ലറിയിലേക്കും പോകണം.  ഏതാണ്ട് 2 മണിക്കൂർ നേരത്തെ പണി അവിടെയും  ഉണ്ട്. വീട്ടിലെത്തുമ്പോ ഏകദേശം 11 - 11.30 ആവും. 

 

 അമ്പലത്തിൽ  പഞ്ചാഭിഷേകം ഉൾപ്പടെ  രാവിലെ 5 മണിക്ക് തുടങ്ങിയ അന്നത്തെ പരിപാടികൾ ഏതാണ്ട് 9 മണി വരെ നീണ്ടു.

എല്ലാം കഴിഞ്ഞ് ഞാനും മേല്ശാന്തിയും പോകാനുള്ള ഒരുക്കങ്ങൾ തുടങ്ങി. എനിക്ക്

ആ ദിവസം ജ്വല്ലറിയിലും പോകേണ്ടതുണ്ട് എന്നറിയാവുന്ന മേൽശാന്തി  എന്നോട് പറഞ്ഞു , 

" ഇല്ലത്തേക്ക് വന്നാൽ ദോശ കഴിച്ചിട്ട് പോകാം " 

 അദ്ദേഹത്തിന്റെ വീട്ടിലേക്ക് ചെന്നാൽ എനിക്ക് ദോശ തരാം, ജ്വല്ലറിയിൽ വിശന്നിരിക്കേണ്ട എന്ന്.

"ദോശ"

അത് കേട്ടപ്പോ  ഒന്നും ഓർക്കാതെ പെട്ടെന്ന് ഞാൻ പറഞ്ഞു  : 

" ദോശയോ. ജനിച്ച അന്ന് മുതൽ ദോശ മാത്രം തിന്ന് വളർന്ന എന്നോട് തന്നെ 'ദോശ തിന്നാൻ വാ' എന്ന് പറയണം അല്ലെ ചേട്ടാ"

അതേ. എന്റെ വീട്ടിൽ ഭൂരിഭാഗം ദിവസങ്ങളിലും ദോശ ആയിരുന്നു പ്രഭാത ഭക്ഷണം.  വളരെ ചെറുപ്പം മുതലേ അത് അങ്ങനെ തന്നെയാണ്. ദോശ എന്ന് കേട്ടാൽ തന്നെ എന്റെ പല സുഹൃത്തുക്കൾക്കും എന്റെ മുഖമാണത്രെ ഓർമ്മ വരിക.

ദോശയുടെ പേരിൽ ' ഇന്നും ദോശയോ' എന്നു മുദ്രാവാക്യം വിളിച്ച് പലതവണ പ്രക്ഷോഭങ്ങൾ ഞാൻ വീട്ടിൽ നടത്തിയിട്ടുണ്ടെങ്കിലും ഒന്നും അമ്മയുടെ അടുത്ത് വിലപ്പോയിരുന്നില്ല. രാവിലെ ദോശ, വൈകിട്ട് കനം കുറഞ്ഞ നെയ്‌റോസ്റ്റ് ദോശ. ( അവന് ചെയ്ഞ്ച് വേണമത്രെ, ചെയ്ഞ്ച്! - 'അമ്മ)

എന്തായാലും ആഴ്ചയിൽ ചുരുങ്ങിയത് 3 ദിവസമെങ്കിലും ദോശ വിട്ടൊരു കളിയില്ല എന്ന് പറയാം.

കാര്യങ്ങൾ അങ്ങനെയൊക്കെയായിരിക്കെ വീണ്ടും ദോശ കഴിക്കാൻ ക്ഷണിച്ചപ്പോ എന്റെ വായിൽനിന്ന് പെട്ടെന്ന്  വന്നുപോയതായിരുന്നു ആ മറുപടി.

എന്നാൽ എന്റെ ആ  മറുപടി കേട്ട മേൽശാന്തി , തിരിച്ച് എന്നോട് ഒരു കഥ പറയുകയാണ് ഉണ്ടായത്.

 

രാവണ വധത്തിന് ശേഷം വിഭീഷണൻ ലങ്ക ഭരിക്കുന്ന കാലം. രാജ്യമങ്ങനെ സമ്പൽ സമൃദ്ധിയിൽ ആറാടി നിൽക്കുന്നു. അങ്ങനെയുള്ള ലങ്ക സന്ദര്ശിക്കാനായി പോയ ഒരു ബ്രാഹ്മണൻ ഇതെല്ലാം കണ്ട് അമ്പരന്നു. അദ്ദേഹം ചുറ്റും നോക്കുമ്പോ കാണുന്നതെല്ലാം സ്വർണ്ണ മയം. സ്വർണ്ണം കൊണ്ടുള്ള പാത്രങ്ങൾ,ഉപകരണങ്ങൾ,വസ്തുക്കൾ എന്നുവേണ്ട രാജ്യമാകെ സമ്പൽ സമൃദ്ധം. 

'കൊള്ളാം. ഇത്രയും ഐശ്വര്യപൂർണ്ണമായ ഈ രാജ്യത്തിലെ ഏറ്റവും വിലപിടിപ്പുള്ള വസ്തു എന്താവും?' 

അത് അറിയാൻ അദ്ദേഹത്തിന്റെ മനസ്സ് കൊതിച്ചു. തന്റെ ആഗ്രഹം രാജാവിന് മുന്നിൽ അവതരിപ്പിച്ച അദ്ദേഹത്തിന്റെ മുന്നിലേക്ക് പട്ടിൽ പൊതിഞ്ഞ് ആ അമൂല്യ വസ്തു എത്തി.

ഇരുമ്പിന്റെ ഒരു ആണി!

(ഐശ്വര്യം കൂടിക്കൂടി അതിന്റെ വില ജനങ്ങൾക്ക് മനസ്സിലാവാതായി.  അവർ അറിഞ്ഞിട്ടില്ലാത്തത് ദാരിദ്ര്യം ആണ്)

കഥ അവിടെ കഴിഞ്ഞു. അതിലെ കാര്യം  പെട്ടെന്ന് തന്നെ എന്റെ ഉള്ളിൽ തെളിഞ്ഞു എന്നതാണ് വാസ്തവം. 

അതിന് ശേഷം മേൽശാന്തി പറഞ്ഞു.

"ഞാനൊക്കെ എന്റെ  ചെറുപ്പകാലത്ത് ദോശ കണ്ടിട്ടുകൂടിയില്ല. അമ്പലത്തിലെ നിവേദ്യം ഇല്ലത്ത് കൊണ്ടുപോയി വേവിച്ച് ഉരുളകളാക്കി മുളക് കൂട്ടി കഴിക്കും. ദോശയൊക്കെ കാണുന്നത് തന്നെ എനിക്കൊരു 21 വയസ്സൊക്കെ ആയപ്പോ ആണ്. അത് തന്നെ വർഷത്തിൽ വിശേഷ ദിവസങ്ങളിലോ മറ്റോ കിട്ടിയാൽ ഭാഗ്യം"

 

പെട്ടെന്ന് ഒന്നും പറയാൻ ഇല്ലാതെ ഞാൻ കുറച്ച് നേരം നിന്നു . തിരികെ പോകുന്നതിന് മുൻപേ ഞാൻ അദ്ദേഹത്തോട് പറഞ്ഞു : 

" എനിക്കും ദോശ ഇഷ്ടമാണ് കേട്ടോ ഏട്ടാ "

"To a man with an empty stomach food is God" -Mahatma Gandhi

 

Useful Government android apps.

 Useful Government apps.

1. eSanjeevaniOPD

Link: https://play.google.com/store/apps/details?id=in.hied.esanjeevaniopd

 Use:  സർക്കാർ സംവിധാനമായ ഇ സഞ്ജീവനി ആപ്പ് ഉപയോഗിച്ച് ഗവണ്മെന്റ് ഡോക്ടേഴ്‌സിനെ വീട്ടിൽ ഇരുന്ന് വിഡിയോ കോൾ മുഖേന  സൗജന്യമായി Consult ചെയ്യാവുന്നതാണ്.

 How:

ആപ്പ് ഇൻസ്റ്റാൾ ചെയ്തതിനു ശേഷം ഓപ്പണ് ചെയ്യുക. Patient Registration ൽ ടച്ച് ചെയ്ത്

ശേഷം കാണുന്ന  സ്കീനിൽ General/Special OPD സെലക്ട് ചെയ്യാം.  അതിന് ശേഷം Name, age and other datas നൽകി മൊബൈലിൽ കിട്ടുന്ന OTP/Token Number ഉപയോഗിച്ച് Login ചെയ്യാം.

ലോഗിൻ ചെയ്തു കഴിഞ്ഞാൽ നമ്മൾ Queue ൽ പ്രവേശിക്കും. ശേഷം നമ്മുടെ അവസരം ആകുമ്പോൾ മൊബൈൽ റിങ്ങ് ചെയ്യുന്നു. അപ്പോൾ  സ്ക്രീനിൽ തെളിയുന്ന  Call Button ഉപയോഗിച്ച് ഡോക്ടറിനെ വിഡിയോ കാൾ വിളിക്കാവുന്നതാണ്.  വിവരങ്ങൾ പറഞ്ഞ ശേഷം ഡോക്ടർ  , മരുന്ന് ആപ്പിലൂടെ തന്നെ അയച്ച് തരുന്നു. ഇത് സ്ക്രീൻ ഷോട്ട് എടുക്കുകയോ Download(pdf) ചെയ്യുകയോ ചെയ്തു മെഡിക്കൽ സ്റ്റോറിൽ നിന്ന് മരുന്ന് വാങ്ങാവുന്നതാണ്.

 

2. DigiLocker

Link: https://play.google.com/store/apps/details?id=com.digilocker.android

 Use:  തിരിച്ചറിയൽ കാർഡ്, ഡ്രൈവിങ്ങ് ലൈസൻസ്,ആധാർ കാർഡ്, പാൻ കാർഡ്,വണ്ടിയുടെ പുക,ഇൻഷുറൻസ് അങ്ങനെ ഗവണ്മെന്റുമായി ബന്ധപ്പെട്ട എല്ലാ രേഖകളും ഡിജിറ്റൽ ആയി സൂക്ഷിക്കാൻ ഒരിടം. 

How:

പ്ലേ സ്റ്റോറിൽനിന്ന് ഡിജി ലോക്കർ ആപ്പ് ഫോണിൽ ഇൻസ്റ്റാൾ ചെയ്യണം. തുടർന്ന് അക്കൗണ്ട് ഉണ്ടാക്കിയശേഷം ആധാർ നമ്പർ നൽകി ഡിജി ലോക്കർ പ്രവർത്തിപ്പിക്കാം. ആധാർ കാർഡ് മൊബൈൽ നമ്പരുമായി ബന്ധിപ്പിച്ച ആർക്കും സേവനം ഉപയോഗിക്കാം.

സർട്ടിഫിക്കറ്റുകൾ നേരിട്ട് ഡിജിറ്റൽ രൂപത്തിൽ ലഭ്യമാക്കുന്നതിനെ 'ഇഷ്യൂഡ് ഡോക്യുമെന്റ്സ്' എന്നുവിളിക്കുന്നു. Issued Documents  എന്ന സെക്ഷൻ ആപ്പ് വിൻഡോയുടെ താഴെ കാണാവുന്നതാണ്.അവിടെ നാം അതുവരെ ആപ്പിൽ നൽകിയ ഡോക്യൂമെന്റ്‌സ് എല്ലാം കാണാവുന്നതാണ്. ആധാർകാർഡ്, ലൈസൻസ് നമ്പർ നൽകിയാൽ ഡിജിറ്റൽ പതിപ്പ് ഫോണിലെത്തും. സ്കാൻചെയ്ത ഏതു സർട്ടിഫിക്കറ്റുകളും സൂക്ഷിക്കാനായി 'അപ്ലോഡഡ് ഡോക്യുമെന്റ്സ്' എന്ന ഓപ്ഷൻ ഉപയോഗിച്ചാൽ മതി. സർട്ടിഫിക്കറ്റുകളും രേഖകളും ഇങ്ങനെ സൂക്ഷിക്കാനാകും.

3.mParivahan

Link: https://play.google.com/store/apps/details?id=com.nic.mparivahan

Use:

വാഹനത്തിന്റെ ആർ.സി.യും ലൈസൻസും സൂക്ഷിക്കാൻ പറ്റുന്ന ആപ്ലിക്കേഷനാണിത്. 

How:

ഗൂഗിളിന്റെ പ്ലേ സ്റ്റോറിൽനിന്ന് ആപ്ലിക്കേഷൻ ലഭ്യമാണ്. മൊബൈൽ നമ്പർ ഉപയോഗിച്ചാണ് അക്കൗണ്ട് എടുക്കേണ്ടത്. വെർച്വൽ ആർ.സി. എടുക്കാനായി വാഹനത്തിന്റെ രജിസ്റ്റർ നമ്പർ നൽകുക. നാല് ഡിജിറ്റ് ഫോർമാറ്റിൽ വേണം ഇത് നൽകാൻ. സേർച്ച് ബാറിൽ നമ്പർ നൽകിയാൽ വാഹനത്തിന്റെ പൂർണവിവരങ്ങൾ കാണാൻ കഴിയും.

'ആഡ് ടു ടാഷ് ബോർഡ് ഫോർ വെർച്വൽ ആർ.സി. എന്ന ബട്ടൺ ക്ലിക്ക് ചെയ്തുകഴിഞ്ഞാൽ വാഹനത്തിന്റെ ചെയ്സിസ് നമ്പർ, എൻജിൻ നമ്പർ എന്നിവയുടെ അവസാനത്തെ നാലക്കം നൽകിയാൽ വെർച്വൽ ആർ.സി. എടുക്കാം. ഇതുപോലെ തന്നെയാണ് വെർച്വൽ ലൈസൻസും എടുക്കേണ്ടത്. ലൈസൻസിന്റെ നമ്പർ നൽകിയാൽ മതിയാകും.

4.PolApp

Link: https://play.google.com/store/apps/details?id=com.keralapolice

Use:കേരള പോലീസിന്റെ എല്ലാ സേവനങ്ങളും ഒരൊറ്റ  ആപ്പില്‍ ലഭ്യമാകുന്ന സംവിധാനമാണ് ഇത്.

കൂടാതെ അത്യാവശ്യ ഘട്ടങ്ങളിൽ രക്ത ലഭ്യത, ലോക്ക്ഡൗണ് സമയത്ത് യാത്ര ചെയ്യാനുള്ള e-pass എന്നിവയ്ക്കും ആപ്പ് ഉപയോഗിക്കാം. 

How:

PolApp എന്ന്  playatore ൽ സെർച്ച് ചെയ്ത് ഇൻസ്റ്റാൾ ചെയ്ത് ഉപയോഗിക്കാവുന്നതാണ്. രജിസ്ട്രേഷന് പ്രോസസ് ഒന്നും ഇല്ല.

5.Ente KSRTC

Link: https://play.google.com/store/apps/details?id=com.keralasrtc.app

Use:  KSRTC യാത്രകൾക്ക് ഉപകാരപ്പെട്ടേക്കാവുന്ന ആപ്പ്. സീറ്റ് ബുക്കിങ്ങ്, ഒരു സ്ഥലത്തു നിന്ന് മറ്റൊരിടത്തേക്ക് ഉള്ള സർവ്വീസിന്റെ എണ്ണം,സമയം അങ്ങനെ KSRTC-യുമായി ബന്ധപ്പെട്ട സേവനങ്ങൾ ആപ്പിൽ ലഭ്യമാണ്.

How: 

Install From playstore & Use. 

രജിസ്ട്രേഷൻ പ്രോസസ് ഇല്ല.

(സീറ്റ് ബുക്കിംഗ് സമയത്ത് വ്യക്തിഗത വിവരങ്ങൾ നൽകണം)

 6.pwd4u

Link: https://play.google.com/store/apps/details?id=com.iroads.pwd.pwd4u

Use:

പൊതുമരാമത്ത് വകുപ്പ് റോഡുകളെ കുറിച്ചുള്ള പരാതികള്‍ ഓണ്‍ലൈനായി അറിയിക്കാന്‍ കഴിയുന്ന മൊബൈല്‍ ആപ്പ്.

How: പൊതുമരാമത്ത് റോഡുകളെ കുറിച്ചുള്ള പരാതികള്‍ മാത്രമാണ് ഈ ആപ്പിലൂടെ പരിഹരിക്കാനാകുക.പൊതുമരാമത്ത് വകുപ്പിലെ റോഡുകള്‍ ഡിജിറ്റലൈസ് ചെയ്യുന്ന പ്രവൃത്തി നടന്നു വരികയാണ്. ഡിജിറ്റലൈസ് ചെയ്ത 4000 കിലോമീറ്റര്‍ റോഡുകളുടെ വിവരം ഈ ആപ്പില്‍ രേഖപ്പെടുത്തിയിട്ടുണ്ട്. ഈ 4000 കിലോമീറ്ററിലെ വിവരം അപ്ലോഡ് ചെയ്താല്‍ ഉടന്‍ അത് ബന്ധപ്പെട്ട ഉദ്യോഗസ്ഥന് ലഭിക്കും. 29,000 കിലോമീറ്ററോളം റോഡിന്റെ ഡിജിറ്റലൈസേഷന്‍ പൂര്‍ത്തിയാക്കാനുണ്ട്. ഇത് നടന്നു വരികയാണ്. ഈ റോഡുകളെ സംബന്ധിക്കുന്ന വിവരങ്ങള്‍ അപ്ലോഡ് ചെയ്താല്‍ കേന്ദ്രീകൃത സംവിധാനത്തിലെത്തുകയും ബന്ധപ്പെട്ട ഉദ്യോഗസ്ഥര്‍ക്ക് അയച്ചുകൊടുക്കുകയും ചെയ്യും.

 Arogya Setu,UMANG,mPassport Seva,  അങ്ങനെ ഒട്ടനവധി ആപ്പുകൾ ഇനിയും ലഭ്യമാണ്. 

Uncharted - A Thief's End

Playing a Videogame was not a newer thing for me. From a brick game, It had stared a long time ago.  

From brick game to Video Game, and then to some PC Games, and then the Legacy started. 

PlayStation 4 games.

From tetris to super mario. From mario to Hercules, PoP (DOS PC Games), From DOS games to Graphics Card games,AC3, NFS MW, From PC Games to Ps4 games. From 1997 to 2018.

Among all these If I wanted to pick a single  game , The best one among all these, Then I'll Pick This Game. 

Uncharted: A Thief's End. The Hit PS4 game. Best Story, Insane Graphics, Realistic Animation, Awesome gameplay Experience..

'Uncharted ' is a Miracle.

PlayStation Exclusives are  much better than other games. God of War, Uncharted,etc are wonderful games . The realistic story and adventures moments in Uncharted  made it differ from other games. 

We can see the details of a scene in every frames.

ചില സംഗീത ചിന്തകൾ

സംഗീതം എങ്ങനെയാണ് ആസ്വദിക്കപ്പെടുന്നത്.

സംസാരത്തിൽ നിന്നും വിഭിന്നമായി,ആശയക്കൈമാറ്റം എന്നതിനുപരിയായി സംഗീതം ആസ്വാദനത്തിനുള്ളതായി മാറിയത് എങ്ങനെ. ആദ്യത്തെ പാട്ട് പാടിയതാരാവാം? സംഗീതത്തിൽ തന്നെ ചില പാട്ടുകൾ നന്നായി ആസ്വദിക്കപ്പെടുന്നതും ചിലത് അത്ര ഹിറ്റ് അല്ലാതെ ആയിപ്പോകുന്നതും എങ്ങനെ?

ആലോചിച്ച് നോക്കിയിട്ടുണ്ടോ?

അതായത്, Sounds ൽ ചിലത് ആരോചകവും ചിലത് ആസ്വാദ്യവും

 ആയി നമുക്ക് അനുഭവപ്പെടുന്നത് എങ്ങനെയാവാം?

  താളം എന്നത് കൃത്യമായ ഇടവേളകളിൽ ആവർത്തിക്കപ്പെടുന്ന ഒരേ രീതിയിലുള്ള ശബ്ദം ആണല്ലോ. ഒരു പ്രത്യേക സമയത്തേക്ക് ഇങ്ങനെ നിശ്ചിത ഇടവേളകളിൽ ആവർത്തിക്കപ്പെടുന്ന ശബ്ദം കേട്ടുകൊണ്ടിരുന്നാൽ കുറച്ചു സമയം കഴിയുമ്പോൾ  നാമറിയാതെ തൊട്ടടുത്തു വരാൻ പോകുന്ന അതേ ശബ്ദത്തിനായി കാതോർക്കും. 

ഉദാഹരണത്തിന് ട്രെയിൻ പാളത്തിലൂടെ പോകുന്ന ശബ്ദം. 

ഏതാണ്ട് അതേപോലുള്ള സംഗീതമാണ് Dil se സിനിമയിൽ  A.R Rahman ന്റെ "ഛയ്യ ഛയ്യ" എന്ന പാട്ടിൽ BG  ആയി കേൾക്കുന്നത്.

അപ്പോൾ , ഈ 'കാത്തിരിപ്പ്' ആണോ സംഗീതം എന്ന മരീചികയുടെ അടിസ്ഥാനം? 

അത് rhythm അഥവാ താളം ആണല്ലോ. രാഗം,ലയം, ശ്രുതി, എന്നിവയ്ക്കൊക്കെ സംഗീതത്തിൽ അതിന്റെതായ സ്ഥാനമുണ്ടല്ലോ.

പദങ്ങൾ  ഇല്ലാതെ മാനുഷിക വികാരങ്ങളെ ശബ്ദം കൊണ്ട് മാത്രം സംഗീതത്തിന് നിയന്ത്രിക്കാനാവുന്നത് എങ്ങനെ?

ഉദാഹരണത്തിന് സന്തോഷസൂചകമായി വരുന്ന Piano Music നും സങ്കടത്തെ ധ്വനിപ്പിക്കുന്ന ഓടക്കുഴൽ നാദത്തിനും ദേഷ്യത്തെയും ആവേശത്തെയും ഭയത്തെയുമൊക്കെ ഉണർത്തുന്ന പലതരം Music നും അതൊക്കെ സാധിക്കുന്നത് എങ്ങനെ? 

നല്ല സംഗീതത്തിന്ഭാഷയോ രാജ്യമോ ഒന്നും അതിർവരമ്പുകളല്ല.

രോഗങ്ങളെ ശമിപ്പിക്കാൻ വരെ ഉപയോഗിക്കപ്പെടുന്ന സംഗീതം തന്നെ പല പരീക്ഷണങ്ങൾക്കും ഉപയോഗിക്കപ്പെട്ടിട്ടുണ്ട്. മൃഗങ്ങളെയും സസ്യങ്ങളേയും സ്വാധീനിക്കാൻ അതിന് കഴിയുന്നു എന്ന് ശാസ്ത്രീയമായി തെളിയിക്കപ്പെട്ടു(https://dengarden.com/gardening/the-effect-of-music-on-plant-growth)

 

മാസ്മരികമായ ശബ്ദലോകത്തെ രാജാവായി സംഗീതം എന്നെന്നും നിലനിൽക്കട്ടെ..

Movie Review 26: Chernobyl(TV Series)

Chernobyl

 അങ്ങനെ ഇന്ന് HBO Miniseries Chernobyl ന്റെ 5-ആമത്തേതും അവസാനത്തേത്തുമായ എപ്പിസോഡ് കണ്ടു.

 ഒരു Overall അഭിപ്രായം പറയുന്നതിന് മുൻപ് ഓർക്കേണ്ട ചില കാര്യങ്ങളുണ്ട്. ഭാവനയിൽ നിന്നും സൃഷ്ടിച്ചെടുത്ത കഥയോ,ഒരു Myth/ ഇതിഹാസ/പുരാണ കഥയോ അല്ല ഇതിലുള്ളത്. തികച്ചും യദാർത്ഥ സംഭവങ്ങളെ ഏതാണ്ട് അതേപടി ആവിഷ്കരിക്കുകയാണ് ചെയ്തിരിക്കുന്നത്. 'അതേപടി' എന്നു പറയാൻ കാരണമുണ്ട്. അത് അവസാനം പറയാം.
 Ep1. 
 ആത്മഹത്യാക്കുറിപ്പ് തയ്യാറാക്കുന്ന വാർദ്ധക്യത്തോടടുക്കുന്ന വ്യക്തി- ഈ സീനോടെ ആണ് തുടക്കം.

 ചേർണോബിൽ ആണവനിലയത്തിലെ സ്ഫോടനവും തുടർന്ന് നടക്കുന്ന രക്ഷാപ്രവർത്തനങ്ങളും , അതിന്  നേതൃത്വം നൽകാനായി ക്ഷണിക്കപ്പെടുന്ന വലേറി ലഗാസോവ് എന്ന ആണവ ശാസ്ത്രജ്ഞന്റെ രംഗപ്രവേശനവും ആണ് പ്രധാനമായും കാണിക്കുന്നത്.
 ബോറിസ് എന്ന , ആണവ നിലയത്തിന്റെ നിയന്ത്രണ ചുമതലയുള്ള, മന്ത്രിസഭയിൽ നിന്നുള്ള ഉദ്യോഗസ്ഥനും ഒപ്പമുണ്ട് .
 വലേറിക്ക് രക്ഷാപ്രവർത്തനത്തിന് ആവശ്യമുള്ള സാമഗ്രികൾ എത്തിക്കാൻ സർക്കാരിന്റെ അനുവാദം വാങ്ങിക്കുന്നത് ബോറിസാണ്.

Ep.2
  ആണവനിലയത്തിലെ വർദ്ധിച്ചുവരുന്ന വികിരണ തോതും അതിനെ നിയന്ത്രിക്കാനെടുക്കുന്ന നടപടികളും. അതിന് പ്രധാന വെല്ലുവിളിയാവുന്ന രാഷ്ട്രീയ ഇടപെടലുകളും എടുത്തുകാണിക്കുന്നു.  ഈ എപ്പിസോഡോടെ Chernobyl , IMDB-യിലെ Top rated series ആയി മാറി. ഒരു നിമിഷം കണ്ണെടുക്കാനാവാത്തത്ര മികച്ച ത്രില്ലർ എപ്പിസോഡ്.

Ep.3
തകർന്ന നിലയത്തിലെ തുടർന്നുള്ള ശുചീകരണപ്രവർത്തനങ്ങൾ.  എങ്ങനെ  ഒരു RBMK Reactor(High Power Channel-type Reactor, RBMK- Short form of its Russian name)
 പൊട്ടിത്തെറിക്കുമെന്ന ചോദ്യത്തിനുത്തരം നൽകാൻ വാലേറിക്ക് ആവുന്നില്ല. തുടർന്ന് ഉലാന കോമ്യുക് എന്ന ന്യൂക്ലിയർ ഫിസിസിസ്റ്റ് നെ അത് കണ്ടെത്താൻ വലേറി ഏൽപ്പിക്കുന്നു.

Ep 4 
 ഉലാനയുടെ അന്വേഷണവും ചേർണോബിൽ ഏരിയയിൽ നടക്കുന്ന Evacuation ഉം ആണ് പ്രധാനമായും കാണിച്ചിരിക്കുന്നത്.

Ep.5
 അതുവരെ ഉണ്ടായിരുന്ന എല്ലാ ചോദ്യങ്ങൾക്കും ഉത്തരം നൽകുന്ന എപ്പിസോഡ്. എങ്ങനെ RBMK Reactor Explosion സംഭവിക്കും, എന്തുകൊണ്ട് അത് സംഭവിച്ചു, എന്തുകൊണ്ട് വലേറി ആത്മഹത്യ ചെയ്തു, എല്ലാത്തിനും.

ശ്രദ്ധക്കുറവ് കൊണ്ടുണ്ടായ അപകടത്തെ മറച്ചുപിടിക്കാനായി സോവിയറ്റ് യൂണിയൻ നടത്തിയ ശ്രമങ്ങളും അതിന്റെ പരിണിത ഫലങ്ങളും കമ്മ്യൂണിസ്റ്റ് രാഷ്ട്രത്തിലെ രാഷ്ട്രീയ ഇടപെടലുകളുടെ ഭീകരതയും വ്യക്തമായി കാണിച്ചിരിക്കുന്നു.

Ending ആണ് ചിന്തിപ്പിക്കുന്ന തരത്തിൽ എടുത്തിരിക്കുന്നത്. ഓരോ കഥാപാത്രത്തിനും യദാർത്ഥ ദുരന്തത്തിൽ എന്ത് സംഭവിച്ചു എന്നവർ കാണിക്കുന്നു. ആകെ കഥയ്ക്കായി അവർ സൃഷ്ടിച്ചത് Evacuation Process ൽ ഉള്ള ഒരു ക്യാരക്ടറിനെ മാത്രം . അതും ആ Process ന്റെ ഭീകരത കാണിക്കാൻ.
ബാക്കി എല്ലാവരും യദാർത്ഥത്തിൽ ഉണ്ടായിരുന്നവർ . യദാർത്ഥത്തിൽ നടന്ന കാര്യങ്ങൾ. അതുകൊണ്ടാണ് ആദ്യം 'അതേപടി ആവിഷ്കരിച്ചു' എന്ന് പറഞ്ഞത്.അതുകൊണ്ട് തന്നെ ആദ്യാന്തം ഇതിന് ഒരു ഭാവനാത്മക കഥയുടെ ത്രിൽ ഒന്നും തരാനായേക്കില്ല. എങ്കിലും 5 എപ്പിസോഡിൽ തീരുന്ന, വലിച്ചുനീട്ടലുകൾ ഇല്ലാത്ത , യദാർത്ഥ സംഭവത്തോട് നല്ല രീതിയിൽ നീതിപുലർത്തുന്ന  മികച്ച ഒരു സീരീസ്.

Movie Review: 25 : ജംഗിൾ - Jungle

യോസി ഗിൻസ്ബർഗ് എന്ന സാഹസികയാത്രികന്റെ യദാർത്ഥ ജീവിതത്തിലെ സംഭവങ്ങളാണ് സിനിമയിൽ. യദാർത്ഥത്തിൽ നടന്ന സംഭവങ്ങൾ, അദ്ദേഹം ഇതേപേരിൽ പുസ്തകമാക്കിയതിനെ ആസ്പദമാക്കി എടുത്ത ചിത്രം.

ജംഗിൾ-

ആമസോണ് മഴക്കാടുകളുടെ വന്യതയും മനോഹാരിതയും ഭീകരതയും എല്ലാം ചിത്രീകരിച്ചിരിക്കുന്ന ഒരു ത്രില്ലർ സിനിമ. ഉൾക്കാടുകളിലൂടെയുള്ള യാത്ര നമ്മൾ ഡിസ്കവറിയിലും അനിമൽ പ്ലാനറ്റിലുമൊക്കെ കണ്ടിട്ടുണ്ടാകാം.

കാട്ടിലെ വിനോദസഞ്ചാര കേന്ദ്രത്തിൽ വെച്ച്
യാദൃശ്ചികമായി  കണ്ടുമുട്ടുന്ന 4  പേര് സംഘമായി ഉൾക്കാടുകളിലേക്ക് യാത്ര തിരിക്കുന്നതാണ് സിനിമ. യോസി ഗിൻസ്ബർഗ്ഗ്,കെവിൻ,കാൾ, മാർക്കസ് എന്നിവർ. റെഡ് ഇന്ത്യൻസിന്റെ ജീവിതം കാണുക, ചിത്രങ്ങൾ പകർത്തുക, എല്ലാത്തിനുമുപരി ഒരു സാഹസിക അനുഭവം സ്വായത്തമാക്കുക എന്നീ ഉദ്ദേശങ്ങളോടെ 4 പേരും യാത്ര തിരിക്കുന്നു.

ദൃശ്യത്തിനെന്നപോലെ ശബ്ദത്തിനും വളരെയധികം പ്രാധാന്യമുള്ള സിനിമ. കാട്ടിലെ ചീവീടുകളുടെ, പുഴയിലെ ഒഴുക്കിന്റെ, പക്ഷികളുടെ,ജീവജാലങ്ങളുടെ, വന്യമൃഗ്രങ്ങളുടെ ,കാട്ടിലെ നിഗൂഢരാത്രിയുടെ..

കാട്ടിലേക്ക് നമ്മളെയും ഒരു പരിധിവരെ എത്തിക്കാൻ സംവിധായകനു സാധിച്ചു. കൂട്ടത്തിൽ
സംഘം ചേർന്ന് യാത്ര ചെയ്യുമ്പോഴുള്ള പരിക്കുകളും അഭിപ്രായ ഭിന്നതയും പ്രശ്നങ്ങളും, ഒറ്റപ്പെട്ട് പോകകുക,വഴിതെറ്റുക തുടങ്ങിയ പ്രശ്നങ്ങളും,മഴയും,സാഹസികതയും,വന്യമൃഗങ്ങളും..

ചിലപ്പോഴൊക്കെ സിനിമയോടൊപ്പം നമ്മളും യാത്രചെയ്യും.
 അതിഗംഭീരം എന്നൊന്നും പറയാനില്ലെങ്കിലും കണ്ടിരിക്കാവുന്ന ഒരു നല്ല സർവൈവൽ ത്രില്ലർ മൂവി.

യോസി ആയി ഡാനിയേൽ റാഡ്ക്ലിഫ് വേഷമിടുന്നു.

നിശ്ശബ്ദം

നിശ്ശബ്ദം

സമയം നട്ടുച്ചയായിരിക്കുന്നു. ക്ലോക്കിൽ ഒന്നരയാവാൻ ഏതാനും മിനിറ്റുകൾ മാത്രം ബാക്കി. തിങ്കളാഴ്‌ച ഒരു പ്രവൃത്തിദിവസമാണെങ്കിലും പ്രവർത്തിക്കാൻ ജോലിയില്ലാത്തവർക്ക് അത് എല്ലാദിവസങ്ങളും പോലെ ഒരു സാധാരണ ദിനം മാത്രം.

 വെയിൽ ഇടവിട്ടിടവിട്ട് കൂടുകയും കുറയുകയും ചെയ്യുന്നുണ്ട്. തെളിഞ്ഞ ആകാശത്തിൽ  വെളുത്ത മേഖങ്ങൾ . കാറ്റുവീശുന്നെങ്കിലും അവ ചലിക്കുന്നുണ്ടായിരുന്നില്ല. പറമ്പിലെ മരങ്ങൾക്കിടയിൽ നിന്ന് ചീവീടുകളുടെയും കാക്കകളുടെയും ശബ്ദം കേൾക്കാം. ഇതിനിടയിലൂടെ ചിലപ്പോഴൊക്കെ മറ്റേതൊക്കെയോ പറവകളുടെ ശബ്ദവുമുണ്ട്. അടുക്കളഭാഗത്ത് ഉച്ചഭക്ഷണം തയാറാക്കുന്നതിന്റെ ഭാഗമായുള്ള ശബ്ദങ്ങൾ.

കണ്ണുകൾ പതിയെ അടച്ച് ചുറ്റുമുള്ള ശബ്ദങ്ങളിലൂടെ ചുറ്റുപാടിനെ കാണാൻ നോക്കണം.
ചീവീടുകളുടെയും പക്ഷികളുടെയും മാത്രമല്ല, തൊട്ടടുത്തുകൂടിയുള്ള ആരുടെയൊക്കെയോ നടത്തം, കാറ്റ്, പ്ലാസ്റ്റിക്ക് കവറുകളുടെ ഞെരുക്കം,കർട്ടനുകളുടെ ചലനം, റഫ്രിജറേറ്ററിന്റെ പ്രവർത്തനം, ക്ളോക്കിലെ സെക്കന്റസൂചിയുടെ ശബ്ദം. ഒന്നുകഴിയുമ്പോൾ അടുത്തതിനായി നമ്മൾ കാതോര്ക്കും.  തൊട്ടടുത്തുള്ള സ്വരങ്ങൾക്കൊപ്പം  റോഡിലൂടെ പോകുന്ന ബസ്സിന്റെ ശബ്ദവും ബുള്ളറ്റിന്റെ ശബ്ദവും ദൂരെ എങ്ങുനിന്നോ ഉള്ള നായകളുടെ കുരയും വരെ കേൾക്കാം..
കോഴികൾ എന്തിനാണാവോ ഈ നട്ടുച്ചയ്ക്ക് കരയുന്നത്. ഇടയ്ക്ക് അതും കേൾക്കാം.

 പിന്നീടെപ്പോഴോ എല്ലാ ശബ്ദത്തിനെയും ഭേദിച്ച് മിക്സി അലമുറയിട്ട് കരയുന്നു.   ഉച്ചയിലെ ചൂട് കനത്തെന്നു തോന്നുന്നു. ടേബിൾഫാനിന്റെ ശബ്ദം കേട്ടുതുടങ്ങി.

ഇത് നിശ്ശബ്ദതയാണോ.

 ഇഴഞ്ഞുനീങ്ങുന്ന സമയത്തിന്റെ പിന്നാലെ പതിയെ നീങ്ങിയാൽ ആ സത്യം മനസ്സിലാവും. പ്രകൃതിയിൽ നിശ്ശബ്ദത എന്നൊന്നില്ല. പുറത്തുനിന്നുള്ള എല്ലാ ശബ്ദങ്ങളെയും തടഞ്ഞ്,ഏറ്റവും നിശ്ശബ്ദം എന്നു കരുതുന്ന ഒരൊറ്റപ്പെട്ട മുറിയിൽ അടച്ചിരുന്നാലും നമുക്ക് നിശ്ശബ്ദതയെ കൂട്ടുപിടിക്കാനാവില്ല.
അങ്ങനെയൊരവസ്ഥയിൽ  നമ്മുടെ സ്വന്തം ഹൃദയമിടിപ്പും ശ്വാസോച്ഛ്വാസവും നമുക്ക് കേൾക്കാനാവും.

പ്രകൃതിയിൽ നിശ്ശബ്ദത എന്നൊന്നില്ല

സിൽമാ നടൻ

വൈകുന്നേരം ഇരുട്ടിത്തുടങ്ങിയ സമയം.തൊടുപുഴയ്ക്കടുത്ത്  പട്ടയംകവലയിലെ ഷൂട്ടിങ്ങ് ലൊക്കേഷനിൽ ചരിത്ര സംഭവം അരങ്ങേറാൻ ഏതാനും നിമിഷങ്ങൾ മാത്രമാണ് ബാക്കിയുള്ളത്. 

സിനിമാ അഭിനയം! 

അതും ഇന്നേവരെ സ്റ്റേജിൽ പോലും അഭിനയിച്ചിട്ടില്ലാത്ത ഞാൻ. 

മിഥുൻ മാനുവൽ തോമസിന്റെ ആട്‌ 2-വിലെ രംഗം ആണ് ഷൂട്ട് ചെയ്യേണ്ടത്.

'വാർത്ത വായിക്കുന്ന രംഗമാണ്' എന്നറിഞ്ഞപ്പോ ഞാൻ സമാധാനിച്ചു.മുഖത്ത്  പ്രത്യേകിച്ച് എക്‌സ്പ്രഷനിട്ട് ബുദ്ധിമുട്ടണ്ടല്ലോ. അല്ലേൽ നവരസം പുറത്തെടുത്ത് ഞാൻ സ്വല്പം ബുദ്ധിമുട്ടിയേനെ. 

3 പാരഗ്രാഫ് ഉള്ള ഒരു വാർത്ത, കാണാതെ പഠിച്ച് ക്യാമറയിലേക്ക് നോക്കി കാണാതെ പഠിച്ച് പറയുന്നതാണെന്ന തോന്നാലുണ്ടാക്കാത്ത വിധത്തിൽ പറയുക. 

സോ സിംപിൾ! അല്ലെ .

കുന്തം! അത് സ്വല്പം പാടാണെന്ന സത്യം അന്നാണ് ഞാൻ മനസ്സിലാക്കിയത്. മേക്കപ്പ് മാൻ വാർത്താവായനക്കാരന്റെ ഹെയർസ്റ്റൈലിൽ(അത് എന്ത് സ്റ്റൈൽ എന്ന് ചോദിക്കരുത്) മുടിചീകി മേക്കപ്പ് ഇട്ട് Look എല്ലാം റെഡിയാക്കി. 

അന്ന് ഉച്ചയ്ക്ക് എനിക്ക് തന്ന "വാർത്ത പാരഗ്രാഫ്" മുഴുവൻ ഞാൻ അരച്ചുകലക്കി കുടിച്ചെന്ന വിശ്വാസത്തിൽ ലൊക്കേഷനിൽ എല്ലാവരും സീൻ ഷൂട്ട് ചെയ്യാൻ തയ്യാറായി. 

VFX നു വേണ്ടി ഏറ്റവും  പിന്നിലായി  ഒരു Green Screen വച്ചിരിക്കുന്നു. ഒരു സ്റ്റേജിന് സമാനമായ , ഉയർന്ന സ്ഥലത്ത് നമ്മൾ സാധാരണ  വാർത്ത വായനയിൽ കാണുന്ന സെറ്റപ്പ് (മേശ, ലാപ്പ്ടോപ്പ്,etc) എല്ലാം

 റെഡിയാക്കിയിട്ടുണ്ട്. അവിടെ ഇരുന്ന് തൊട്ടമുന്നിൽ കാണുന്ന ക്യാമറയിൽ നോക്കി പഠിച്ചുവച്ചിരിക്കുന്ന  വാർത്ത കാണാതെ പറയുക. സംഗതി സിംപിൾ!

നേരം ഇരുട്ടിത്തുടങ്ങിയിരുന്നെങ്കിലും ഷൂട്ടിങ്ങ് കാണാൻ ധാരാളം ആളുകൾ ചുറ്റും നിന്നിരുന്നു. തൊട്ടുമുന്നിൽ സ്റ്റേജിന് താഴെ പ്രശസ്ത സംവിധായകൻ മിഥുൻ. സംവിധായകന്റെ കുറച്ചുകൂടി മുന്നിൽ ക്യാമറ സെറ്റ് ആക്കി പ്രിയപ്പെട്ട അളിയൻ വിഷ്ണുവേട്ടൻ.  കക്ഷിയുടെ കെയറോഫിൽ  ഈ സീനിൽ എത്തിപ്പെട്ട ഞാൻ സ്റ്റേജിൽ നിൽക്കുന്നു.  ഇവരുടെഎല്ലാവരുടെയും കണ്ണുകൾ സ്റ്റേജിൽ നിൽക്കുന്ന എന്നിലേക്ക്.

മേക്കപ്പിന്റെ അവസാന മിനുക്കുപണികളും കഴിഞ്ഞ് വാർത്താവായനക്കാരനായി ഞാൻ മേശയ്ക്ക് പിന്നിൽ ഇരുന്നു.

ക്യാമറ സെറ്റ് ചെയ്ത് വിഷ്ണുവേട്ടൻ.  ഷൂട്ടിങ്ങ് തുടങ്ങാൻ നിമിഷങ്ങൾ ബാക്കി.

"ക്യാമറ റോളിങ്ങ്" "റെഡി" എന്നീ ശബ്ദങ്ങൾക്ക് ശേഷം

മിഥുൻ 'ആക്ഷൻ' എന്നു പറയുന്നത് കേട്ടതും  അത് സംഭവിച്ചു.

അതുവരെയുള്ള preparation എല്ലാം കയ്യീന്ന് പോയി.

അഴകിയരാവണൻ സിനിമയിലെ ഇന്നസെന്റിനെ പോലെ ഒരു ആറേഴു പ്രാവശ്യം

'തോന്നയ്ക്കൽ പഞ്ചായത്തിലെ ഓരോ അരിയും ഞാൻ പെറുക്കി എടുത്തു' തുടങ്ങിയപ്പോൾ വിഷ്ണുവേട്ടനും മടുത്തെന്നു തോന്നുന്നു. കക്ഷി ക്യാമറ സെറ്റ് ആക്കി വെച്ചതിനു ശേഷം തൊട്ടപ്പുറത്തിരിക്കുന്ന സംവിധായകന്റെ ഒപ്പം , കക്ഷി നോക്കിക്കൊണ്ടിരുന്ന സ്‌ക്രീനിൽ നോക്കിയിരിക്കാൻ തുടങ്ങി. എല്ലാത്തിനുമുപരി ഈ 'ആക്ഷൻ-കട്ട്' തന്നെ കണ്ടുകണ്ട് ചുറ്റിനുമുള്ള ആളുകളും എന്തൊക്കെയോ പിറുപിറുത്തുകൊണ്ടിരിക്കുന്നു .

'ആക്ഷൻ''ആക്ഷൻ' പറഞ്ഞ് മിഥുനും  കഥാപാത്രത്തെ  എന്നിലേക്ക് ആവാഹിച്ച്   ആവാഹിച്ച് ഞാനും മടുത്തു. ഒരു തവണ പോലും മുഴുവൻ പാരഗ്രാഫും, പോട്ടെ പകുതിയെങ്കിലും ക്യാമറയിൽ നോക്കി തെറ്റാതെ പറഞ്ഞിട്ടില്ലെങ്കിലും ഒടുവിൽ എല്ലാം ഒക്കെ ആയി എന്ന് നിർദ്ദേശം എനിക്ക് കിട്ടി.  കാരണം , എന്റെ സീൻ കഴിഞ്ഞിട്ട് വേണമായിരുന്നു അവർക്ക് അന്നത്തെ ഷൂട്ടിങ്ങ് നിർത്തി പോകാൻ.

അവിചാരിതമായി കിട്ടിയ ചാൻസ്. 

അഭിനേതാവിന്റെ യാതൊരു കഴിവും എന്നിൽ ഇല്ലെന്ന് ഉറപ്പായിരുന്നെങ്കിലും ആ ചാൻസ് വെറുതെ കളയാൻ പറ്റില്ലല്ലോ.

നാളുകൾ കടന്നുപോയി.

 അങ്ങനെ ആട് 2 റിലീസ് ദിവസം വന്നെത്തി. 

ആരോടും ഈ സംഭവം പറഞ്ഞിട്ടില്ലായിരുന്നെങ്കിലും സിനിമ കണ്ടിറങ്ങിയ ചില ഫ്രണ്ട്സ്  , ആ വര്ഷത്തെ നാഷണൽ അവാർഡ് എനിക്കാണെന്ന തരത്തിൽ തള്ളിമറിച്ച് ഫോണ് വിളിച്ചു. 

ഷാജി പാപ്പൻ തരംഗം കേരളത്തിൽ അലയടിച്ചു. സിനിമ സൂപ്പർഹിറ്റായി.

അതേ. ഞാൻ "അഭിനയിച്ച" ആദ്യ പടം തന്നെ സൂപ്പർഹിറ്റ്. 

സിനിമയിൽ എന്റേത് ഏതാനും

സെക്കന്റുകൾ മാത്രമുള്ള സീൻ ആയിരുന്നെങ്കിലും പിന്നീട് പലരും സിനിമ കണ്ട് അതിൽ എന്നെ തിരിച്ചറിഞ്ഞ് സംസാരിച്ചത് കണ്ട് ഞാൻ തന്നെ അമ്പരന്നിട്ടുണ്ട്. എന്നെ മുൻപരിചയമില്ലാത്തവർക്ക് ആ സീനിൽ എന്നെ തിരിച്ചറിയാൻ പാടായിരിക്കുമെന്ന കണക്കുകൂട്ടലുകളും പിന്നീട് പലതവണ തെറ്റിയിട്ടുണ്ട്.

അങ്ങനെ ഏതൊരു ശരാശരി മലയാളിയുടെയും സ്വപ്നമായ സിനിമാ അഭിനയം അവിടെ പൂവണിഞ്ഞു. എന്നും ഓർക്കാൻ നല്ലൊരു അനുഭവമായി അത് മാറി. 

ഇങ്ങനെയൊരു സാഹചര്യമൊരുക്കിത്തന്ന പ്രിയ സുഹൃത്തും ആട് 2  സിനിമാട്ടോഗ്രാഫറും ആയ  വിഷ്ണുവേട്ടനെ  ഒന്നൂടെ മനസ്സിൽ  സ്മരിച്ചുകൊണ്ട് ഈ എഴുത്ത് നിർത്താം..

Movie Review 24: Interstellar - ഇന്റെർസ്റ്റെല്ലർ

Interstellar.

ബ്ളാക്ഹോളിന്റെ Photo എടുത്ത പശ്ചാത്തലത്തിൽ കാണാൻ പറ്റിയ സിനിമ. പറയുന്ന പോലെ അത്യധികം ബൗദ്ധിക മണ്ഡലങ്ങൾ കടന്ന് ചിന്തിക്കേണ്ട അർത്ഥ തലങ്ങളുള്ള സിനിമ എന്ന് പറയാനൊന്നുമില്ലെങ്കിലും കുറെ ശാസ്ത്രീയ വാക്കുകളുടെ നിർവ്വചനം, സിനിമ മനസ്സിലാക്കാൻ ഉപകാരപ്രദമാകുമെന്ന് തോന്നുന്നു.

1.Black Hole: തമോഗർത്തം. പ്രപഞ്ചത്തിലെ ഏറ്റവും ആകർഷണ ശക്തിയുള്ള പ്രത്യേക ഭാഗം. തൊട്ടടുത്തെത്തുന്ന പ്രകാശത്തെ ഉൾപ്പടെ തന്നിലേക്ക് എന്നെന്നേക്കുമായി ,ഒരിക്കലും വെളിയിൽ കടക്കാനാവാത്ത വിധത്തിൽ ആകർഷിച്ച് ചേർക്കുന്നു.
ഇത് ഒരു വസ്തുവോ, കാണാത്തക്ക വിധത്തിലുള്ള എന്തെങ്കിലുമോ അല്ല. ആകെ ഇതിനുള്ളത് അതിശക്തമായ ഒരു ആകർഷണ വലയവും അതിന്റെ കേന്ദ്രവുമാണ്. ഈ കേന്ദ്രത്തെ ആണ് Singularity എന്നു പറയുക. അതുകൊണ്ട് തന്നെ ഇതിലേക്ക് പതിക്കുന്ന ഒരു വസ്തുവിന് എന്ത് സംഭവിക്കും എന്നു പറയാനാകില്ല.
ഒരുപക്ഷേ മറ്റൊരു ഗാലക്സിയിലേക്ക് വലിച്ചെത്തിച്ചേക്കാം.

2. Worm Hole:
 രണ്ട് ഗാലക്സികളെ തമ്മിൽ ബന്ധിപ്പിക്കുന്ന ഇടനാഴി.( ഇങ്ങനെ ഒരു സംഗതി യദാർത്ഥത്തിൽ കണ്ടെത്തിയിട്ടില്ല). (ബ്ളാക് ഹോളിന്റെ കേന്ദ്രം, ഒരു വേം ഹോളാണെന്ന തിയറിയുമുണ്ട്).

 3.പ്രകാശവര്ഷം: സെക്കന്റിൽ ഏതാണ്ട് മൂന്ന് ലക്ഷം കിലോമീറ്റർ എന്ന കണക്കിൽ പ്രകാശം ഒരു വർഷം സഞ്ചരിക്കുന്ന ദൂരം. നക്ഷത്രങ്ങൾ തമ്മിലുള്ള അകലമളക്കാൻ ഉപയോഗിക്കുന്നു.

4.Newton's 3rd Law of Motion:  ഏതൊരു പ്രവൃത്തിക്കും തുല്യവും വിപരീതവുമായ പ്രതിപ്രവർത്തനം ഉണ്ടാകും.

 നാസയിൽ പണ്ട്  പൈലറ്റായിരുന്ന കൂപ്പർ ആണ് കഥാനായകൻ. ടോം, മർഫ് എന്നിങ്ങനെ ഒരു ആണ്കുട്ടിയും പെണ്കുട്ടിയും പിന്നെ അവരുടെ മുത്തച്ഛനുമടങ്ങുന്ന കുടുംബം.
ഇപ്പൊ കർഷകനായി ജോലി ചെയ്യുന്ന കൂപ്പറിന്റെ വീട്ടിൽ ഒരിക്കൽ ചില അസാധാരണ സംഭവങ്ങൾ ഉണ്ടാവുന്നു. ഷെൽഫിൽ നിന്ന് പുസ്തകങ്ങൾ തനിയെ വീഴുന്നു.മർഫ് അത് ഒരു ഭൂതമാണെന്ന് വാദിച്ചു.

 ശക്തമായ പൊടിക്കാറ്റിൽ കർഷകർക്ക് ആകമാനം നാശനഷ്ടങ്ങൾ സംഭവിച്ചു. കൃഷി ഇല്ലാതായിതുടങ്ങി. കാറ്റടങ്ങിയത്തിനു ശേഷം മർഫിന്റെ മുറിയിലെത്തിയ കൂപ്പറിന് അവിടെ വീണ പൊടിയിൽ ചില പ്രത്യേകതകൾ കാണാൻ സാധിക്കുകയും അതിനെ Decode ചെയ്തപ്പോ കൂപ്പറിന് Map ലെ 2 Coordinate കിട്ടുകയും  കൂപ്പറും മർഫും അങ്ങോട്ടേക്ക് തിരിക്കുകയും ചെയ്യുന്നു.
Nasa യുടെ ഒരു Secret Project ആയ  'ലാസറസ് ' നടക്കുന്ന രഹസ്യ സാങ്കേതമായിരുന്നു അത്. ഭൂമിയിലെ മനുഷ്യരുടെ നിലനിൽപ്പ് അപകടത്തിലാണെന്നും കഷ്ടി അടുത്ത തലമുറയ്ക്ക് കൂടി ഉള്ള ആഹാരമേ ഭൂമിയിൽ അവശേഷിക്കുന്നുള്ളൂ എന്നും  നാസ ശാസ്ത്രജ്ഞനായ ബ്രാൻഡ് കൂപ്പറിനെ ബോധ്യപ്പെടുത്തുന്നു.


ഇതിൽ നിന്ന് രക്ഷപ്പെടാൻ ഉള്ള പ്രോജക്ട് ആണ് ലാസറസ്.
കൂപ്പറിന് ദൗത്യ തലവനായി ബ്രാൻഡ് നിയമിക്കുന്നു.
ഇതിൽ 2 പ്ലാൻ ആണ് ഉള്ളത്.
പ്ലാൻ A.
 ഭൂമിയിൽ നിന്ന് മനുഷ്യവർഗ്ഗത്തെ വാസയോഗ്യമായ ഒരു ഗ്രഹം കണ്ടെത്തി അങ്ങോട്ടേക്ക് മാറ്റിപ്പാർപ്പിക്കുക.
Plan B.
കുറച്ച് ആളുകളെ മാത്രം വാസയോഗ്യമായ ഗ്രഹത്തിലേക്ക് അയക്കുക . ശേഷം അവരുടെ തലമുറകളെ ഗ്രഹത്തിൽ വളർത്തിയെടുക്കുക.

Plan A യ്ക്ക് വേണ്ടി Black Hole ലൂടെ യാത്ര ചെയ്യേണ്ടതായുണ്ട്. ബ്ളാക് ഹോളിലൂടെ ഉള്ള യാത്ര സാധ്യമാവാൻ സങ്കീർണമായ ഒരു Equation,  ബ്രാന്ഡിന് പൂർത്തിയാക്കേണ്ടതുണ്ട്. ഇതിനായി Black Hole ലെ യാത്രയുടെ Data യും വേണം.

വാസയോഗ്യമായ ഗ്രഹം കണ്ടെത്തുന്നതിനായി മുൻപ് അയച്ച 12 ശാസ്ത്രജ്ഞരിൽ 1 ആൾ ഒഴികെ മറ്റാരുടെയും Responds , ബ്ളാക്ഹോളിൽ കടന്ന കൂപ്പറിന് ലഭിച്ചിരുന്നില്ല. പോസിറ്റീവ് ആയ റെസ്പോണ്ടസ് ലഭിച്ച അങ്ങോട്ടേക്ക് കൂപ്പറും കൂട്ടരും യാത്ര തിരിക്കുന്നു.

Plan A, Plan B എന്നിവയെ കുറിച്ചൊന്നും അറിയാതെ കൂപ്പർ, കൂടെ ബ്രാൻഡിന്റെ മകളായ അമേലിയ, ടാർസ് എന്ന റോബോട്ട്, പിന്നെ രണ്ട് ശാസ്ത്രജ്ഞർ എന്നിവരാണ് സംഘത്തിലുള്ളത്.

ബ്ളാക് ഹോളിലൂടെ യാത്ര ചെയ്ത് അവർ ആദ്യം ഒരു ഗ്രഹത്തിൽ എത്തിച്ചേരുന്നു. മില്ലേഴ്‌സ് പ്ലാനറ്റ് എന്നറിയപ്പെടുന്ന അവിടെ ജലത്താൽ മുങ്ങിക്കിടക്കുന്ന പ്രതലം മാത്രമായിരുന്നു ഉള്ളത്. അത് വാസയോഗ്യമല്ല എന്ന് തിരിച്ചറിയുന്ന കൂപ്പറും സംഘവും അടുത്ത ഗ്രഹം തിരഞ്ഞെടുക്കാൻ തീരുമാനിക്കുന്നു-പോസിറ്റീവ് സിഗ്നൽ ലഭിച്ച മാൻസ് പ്ലാനറ്റ് .
ആകെ ഒരു ഗ്രഹത്തിൽ പോകാനുള്ള ഇന്ധനമേ അവശേഷിക്കുന്നുള്ളൂ. Positive Signals ലഭിച്ച ഗ്രഹത്തിലേക്ക് തിരിക്കുന്ന കൂപ്പർ, തങ്ങൾക്ക് ചതിവ് പറ്റിയതായി തിരിച്ചറിയുന്നു-ആ ഗ്രഹവും വാസയോഗ്യമായിരുന്നില്ല. അതിൽ പെട്ടു Hybernated ആയി കിടക്കുകയായിരുന്ന Dr . മാൻ, രക്ഷപ്പെടാനായി ഇറക്കിയ തന്ത്രമായിരുന്നു ആ 'Positive signal'.
സത്യം മനസ്സിലാക്കിയ കൂപറിനെ വകവരുത്താൻ മാൻ ശ്രമിക്കുന്നെങ്കിലും പരാജയപ്പെടുന്നു. തുടർന്നുള്ള മടക്കയാത്രയിൽ സ്ഫോടനം സംഭവിച്ച് മാൻ കൊല്ലപ്പെടുന്നു. .

മില്ലേഴ്‌സ് പ്ലാനറ്റിലെ ഒരു മണിക്കൂർ, ഭൂമിയിലെ  ഏഴ് വർഷത്തിന് തുല്യമായിരുന്നു എന്ന് മനസ്സിലാക്കുന്ന കൂപ്പർ, തന്റെ മക്കൾ വളർന്ന് നാസയിൽ തന്നെ സയന്റിസ്റ്റ് ആയി ജോലി ചെയ്യുന്ന വിവരമറിയുന്നു. സന്ദേശങ്ങൾ സ്വീകരിക്കാനാവുമായിരുന്നെങ്കിലും ബ്ളാക്ക് ഹോളിന്റെ വെളിയിലേക്ക് അയക്കാൻ സാധിച്ചിരുന്നില്ല.

ഇടിവെട്ടിയവനെ പാമ്പ് കടിച്ചപോലെ അടുത്ത വാർത്തയും കൂപ്പറിനെ തേടി എത്തി - Plan A ഒരിക്കലും സാധ്യമാവില്ല എന്നറിയാമായിരുന്ന ബ്രാൻഡ്, Plan B മാത്രം നടപ്പിലാക്കുക എന്ന ഒറ്റ ലക്ഷ്യത്തോടെ ആണ് കൂപ്പറിനെയും സംഘത്തെയും അയച്ചത് എന്ന വസ്തുത.

ഇതറിഞ്ഞ കൂപ്പർ, ക്ഷുഭിതനായി തിരികെ പോകാൻ തീരുമാനിക്കുന്നു. ബ്ളാക് ഹോളിന്റെ വെളിയിലേക്ക്.

അങ്ങനെ തിരികെ യാത്ര ആരംഭിക്കുന്ന കൂപ്പറും സംഘവും മറ്റൊരു കാര്യം കൂടി പ്ലാൻ ചെയ്യുന്നു.Black Hole ൽ നിന്നും Equation solve ചെയ്യാനാവശ്യമായ ഡാറ്റ ശേഖരിക്കുക. അതിനായി ടാർസ് റോബോട്ടിനെ പോകുന്ന വഴി ബ്ളാക് ഹോളിൽ ഉപേക്ഷിക്കുക.


എന്നാൽ തിരികെ ഉള്ള യാത്രയിൽ മറ്റൊരു കാര്യം കൂടി സംഭവിച്ചു. ബ്ളാക് ഹോളിന്റെ ശക്തമായ ആകർഷണത്തിൽ നിന്ന് രക്ഷപ്പെടാൻ 'തുല്യവും വിപരീതവുമായ പ്രതി പ്രവർത്തനത്തിന്റെ' ശക്തി കുറയ്ക്കേണ്ടതുണ്ട്. പേടകത്തിന്റെ ഭാരം പരമാവധി കുറയ്ക്കാൻ അമേലിയയെ പേടകത്തിൽ വിട്ട് കൂപ്പറും ടാർസ് റോബോട്ടും ബ്ളാക് ഹോളിന്റെ അഗാധതയിലേക്ക് കൂപ്പുകുത്തുന്നു. .


അവിടെ ആണ് പ്രേക്ഷകന്റെ കിളികൾ പറക്കാൻ സാധ്യതയുള്ളത്.   ഒരു Line , 1 Dimension ആണ്. അതിന് നീളം എന്ന ഒറ്റ അളവ് മാത്രമാണുള്ളത്. എന്നാൽ ഒരു ചതുരം 2D ആണ്. അതിന് നീളം, വീതി എന്നിങ്ങനെ 2 മാനങ്ങൾ ഉണ്ട്. അതുകൊണ്ട് തന്നെ ഒരു പ്രതലത്തിൽ വരയ്ക്കുന്ന ചിത്രങ്ങൾ 2D ആയിരിക്കും. ഇതിനോടൊപ്പം ഉയരവും കൂടി ചേർന്നാൽ അത് 3D ആയി. Real World ൽ നാം കാണുന്ന വസ്തുക്കൾ എല്ലാം 3D ആണ്-നിശ്ചിത നീളം, വീതി,ഉയരം എന്നിവ ഉള്ളത്.
4th Dimension
 ആണ് Space. 5th Dimension ആയി ചിത്രത്തിൽ കാണിക്കുന്നതാണ് Time .

ഒരു ബ്ലാക്ക് ഹോളിനുള്ളിൽ പെട്ട് പോകുന്ന കൂപ്പർ, ഇത്തരത്തിൽ ഒരു 5D ലോകത്താണ് എത്തിച്ചേരുന്നത്.
Time , ഒരു അളവാണ് അവിടെ .
ഭൂമിയിലെ വർഷങ്ങൾ കടന്നുപോയെങ്കിലും മണിക്കൂറുകൾ മാത്രം  സ്പെയ്സിൽ ചിലവഴിച്ച കൂപ്പറിനെ വാർദ്ധക്യം ബാധിച്ചിട്ടില്ല.

 അവിടെ ,  ഭൂമിയിലെ തന്റെ മകളെ,മർഫിന്റെ ചെറുപ്പകാല പ്രായത്തിൽ കൂപ്പർ അവിടെ ഒരു Projection ആയി കാണുന്നു.
Tesseract എന്ന ആ പ്രദേശത്തെ  സമയവും അവിടെ ഒരു അളവുകോലാണ്. മറ്റ് സ്ഥലങ്ങളിലേക്ക് നീങ്ങിയാൽ , തന്റെ മകളുടെ വളർന്ന പ്രായവും കൂപ്പറിന് കാണാനാകും.

ബ്ളാക്ക് ഹോളിനുള്ളിൽ നിന്ന് തന്റെ മകൾക്ക് സന്ദേശമായക്കാനാവില്ല. കൂപ്പർ അതിനായി തിരഞ്ഞെടുക്കുന്ന വഴിയാണ് ഗ്രാവിറ്റി.
ഷെൽഫിലെ പുസ്തകങ്ങൾക്കിടയിലൂടെ മകളെ കാണുന്ന കൂപ്പർ, കൂപ്പറിനെ തന്നെയും അവിടെ കാണുന്നു. കാരണം ആ സമയത്ത് കൂപ്പർ അവിടെ ഉണ്ട്.
 അവർക്ക് മോഴ്‌സ് കോഡ് രൂപത്തിൽ പുസ്തകങ്ങൾ തള്ളിയിട്ട് ഗ്രാവിറ്റിയുടെ സഹായത്തോടെ ,   'Stay' എന്ന സന്ദേശമായക്കാൻ ശ്രമിക്കുന്നു. ഇത് മനസ്സിലാക്കുന്ന, യദാർത്ഥ ലോകത്തിലെ പ്രായമായ മർഫ്, പുസ്തകങ്ങൾ വീഴാൻ കാരണം, ഭൂതമല്ല തന്റെ അച്ഛൻ തന്നെ ആണെന്ന് തിരിച്ചറിയുന്നു.

ഒപ്പം കൂപ്പർ , ടാർസ് Decode ചെയ്ത Equation solve ചെയ്യാനാവശ്യമായ Blackhole  Data യും മകൾക്ക് ഒരു വാച്ചിലൂടെ അയക്കുന്നു. അങ്ങനെ നാസയിലെ എഞ്ചിനീയർ ആയ , കൂപ്പറിന്റെ മകൾ Plan A Successful ആയി നടപ്പാക്കുന്ന , എക്കാലത്തെയും മഹതി ആയ ശാസ്ത്രജ്ഞ ആയി മാറുന്നു.

തുടർന്ന് Tesseract ഇല്ലാതാവുകയും ,കൂപ്പർ ബോധരഹിതനാവുകയും ചെയ്യുന്നു.
കണ്ണുതുറക്കുന്ന കൂപ്പർ, താൻ ഡോക്ടറുടെ അരികിൽ കിടക്കുന്നതായി മനസ്സിലാവുന്നു. Plan A യുടെ ഭാഗമായി പുറപ്പെട്ട  പേടകം- 'കൂപ്പർ സ്റ്റേഷൻ'ആണത്.
കൂപ്പറിനോടുള്ള ബഹുമാനസൂചകമായി ഇട്ട പേര്- മർഫിൻ കൂപ്പറോട് ഉള്ള-..

ഭൂമിയിൽ നൂറു വയസ്സിനടുത്ത് പ്രായമുള്ള വാർദ്ധക്യസയ്യയിൽ കിടക്കുന്ന മകളും മുപ്പതുകളിൽ ഉള്ള ശരീരവും നൂറ്റിയിരുപതിനു മുകളിൽ പ്രായമുള്ള അച്ഛനും പരസ്പരം കാണുന്നു.
  Plan A വിജയിച്ചതറിയാതെ Plan B യ്ക്ക് വേണ്ടി അമേലിയ മറ്റൊരു ഗ്രഹത്തിൽ കോളനി ഉണ്ടാക്കാനുള്ള ശ്രമത്തിലാണെന്നറിഞ്ഞ മർഫിൻ, അമേലിയയെ രക്ഷിക്കാൻ, തിരിച്ചെത്തിക്കാൻ കൂപ്പറോട് അപേക്ഷിക്കുന്നു. അങ്ങനെ അതിനായി വീണ്ടും  കൂപ്പർ Space യാത്രയ്ക്കൊരുങ്ങുന്നിടത്തു ചിത്രം അവസാനിക്കുന്നു.

കൂപ്പറിന്റെ ആവശ്യം കഴിഞ്ഞ ഉടനെ Tesseract അപ്രത്യക്ഷമായതെങ്ങനെ, ഗ്രാവിറ്റിയെ  വേറൊരു Dimension ൽ നിന്ന് കൂപ്പർ എങ്ങനെ Access ചെയ്തു? ഒരു വാച്ച് എങ്ങനെ Tesseract ൽ നിൽക്കുന്ന കൂപ്പർ നിയന്ത്രിച്ചു, Tesseract ൽ നിൽക്കുന്ന കൂപ്പറിന്, എങ്ങനെ ഭൂമിയിലെ പുസ്തകങ്ങൾ തള്ളിയിടാൻ സാധിച്ചു?(ഗ്രാവിറ്റി ഉണ്ടെങ്കിലും, തള്ളിയിടാതെ താഴെ വീഴില്ലല്ലോ) എന്നതൊക്കെ ചില സംശയങ്ങളാണ്.

Movie Review 23: True Lies - ട്രൂ ലൈസ്

True Lies


Fights against terrorists, and a lot of comedy. One of the best film by James Cameron.
 തീവ്രവാദം തമാശയുടെ രൂപത്തിൽ അവതരിപ്പിച്ചിരിക്കുന്ന ഒരു നല്ല ഒന്നാന്തരം Entertainer ആണ് True Lies.  വിഖ്യാത ചലച്ചിത്രകാരൻ James Cameron ന്റെ തിരക്കഥയിലും സംവിധാനത്തിലും ഒരുങ്ങിയ ഒരു നല്ല സിനിമ.

അർണോൾഡ് അവതരിപ്പിക്കുന്ന ഹാരി ടാസ്‌കർ എന്ന കഥാപാത്രമാണ് ചിത്രത്തിലെ നായകൻ. ഭാര്യ ഹെലൻ, ഏക മകൾ ഡാന എന്നിവരടങ്ങുന്ന കുടുംബം.
കംപ്യൂട്ടർ സെയിൽസ് ഏജന്റ് ആയ ഹാരിയും, സഹായത്തിന് ഭാര്യയും സ്‌കൂളിൽ പഠിക്കുന്ന മകളും.
വീട്ടിലെ മുഖം 'കമ്പ്യൂട്ടർ സെയിൽസ് ഏജന്റ്'  എന്നതാണെങ്കിലും യദാർത്ഥത്തിൽ ഹാരി, യു.എസ്.ഗവണ്മെന്റിന്റെ സീക്രട്ട് കൗണ്ടർ ടെററിസം ടാസ്‌ക് ഫോഴ്‌സ് ആയ 'ഒമേഗ സെക്ടറി'ൽ ജോലി ചെയ്യുന്ന സ്പൈ ആണ്. 15 വർഷമായിട്ടു കൂടെ ഉള്ള കുടുംബത്തിന് പോലുമാറിയാത്ത രഹസ്യം.

 തന്റെ ജോലിയുടെ ഭാഗമായി ഹാരിക്കും കൂട്ടുകാർക്കും 'ക്രിംസൻ ജിഹാദ്' എന്ന ഭീകര സംഘടമായ്‌ക്കെതിരെ പോരാടേണ്ടി വരുന്നതും അതിന്റെ ഭാഗമായി സംഭവിക്കുന്ന വളരെ രസകരമായ സംഭവവികാസങ്ങളുമാണ് സിനിമയിൽ ചിത്രീകരിച്ചിരിക്കുന്നത്. ഒരു ആനിമേഷൻ മൂവിയിലെന്ന പോലെ കോമഡി, ആക്ഷൻ രംഗങ്ങൾ ഇടകലർന്ന് വരുന്നു.

രണ്ടര മണിക്കൂർ ദൈർഘ്യമുണ്ടെങ്കിലും ടെൻഷൻ റിലീഫ് നു വേണ്ടിയും സമാധാനമായും
ഒട്ടും ബോറടിക്കാതെ അവസാനം വരെ കണ്ടിരിക്കാവുന്ന നല്ല സിനിമ.